Седница на грчкиот владин совет за национална безбедност по најавените активности на Турција во Медитеранот

Начините за реагирање за турската провокација и ситуацијата во Источниот Медитеран биле темите што се разгледале на состанок на владиниот совет за национална безбедност, соопштија од кабинетот на грчкиот премиер Кирјакос Мицотакис.

Состанокот беше свикан откако рано утрово Турција издаде нова навигациска информација (Navtex) за сеизмички истражувања на бродот „Оруч рејс“, што според грчките медиуми, го опфаќа морскиот дел меѓу островите Родос и Кастелоризо.

Хидрографската служба на грчката воена морнарица, како што објавија медиумите во Грција, со контра „Навтекс“ ѝ одговорила на Турција.

Согласно издадената навигациска информација од станицата на Крит, турската служба се карактеризира како неополномоштена, а турската активност како нелегална поради тоа што е во дел во рамките на грчкиот континентален гребен.

Државниот министер на Грција Јоргос Герапетритис, говорејќи за државната телевизија ЕРТ рече дека ги следат сите потези на Турција.

– Смирени сме, но и решени да не прифатиме никаква провокација во морските зони, истакна Герапетритис.

Координатите на денешната турска „Навтекс“, според грчките медиуми се идентични и во истиот морски дел, како и претходната навигациска информација издадена пред 20-ина дена, меѓутоа тогаш, бродот воопшто не ги започна истражувањата, ги заостри односите меѓу Грција и Турција, а германските медиуми тогаш пишуваа дека Ангела Меркел интервенирала за смирување на тензиите.

Овој пат, според весникот „Катимерини“ бродот „Оруч рејс“ во придружба на воени турски бродови плови кон грчкиот континентален гребен за да започне истражувања јужно од Кастелоризо, а издадената „Навтекс“ завршува онаму каде што започнуваат координатите од договорот меѓу Грција и Египет за одредување на Ексклузивната економска зона.

А токму за договорот меѓу Атина и Каиро, грчкиот премиер Мицотакис го информирал претседателот на Европскиот совет Шарл Мишел во нивниот денешен телефонски разговор.

Според грчки владини извори, Мицотакис попладнево ќе разговара и со Генералниот секретар на НАТО.