Се реконструираат средните училишта во Скопје

Град Скопје во текот на летниот распуст врши реконструкција на средните училишта за да ги подобри условите за работа. Летово градежни работи веќе се одвиваат во 16 средни училишта, а Град Скопје за реализација на овој проект од буџетот издвои околу 22,3 милиони денари.

Ова го истакна скопскиот градоначалник Коце Трајановски, кој денеска го посети средното училиште на Град Скопје „Цветан Димов“ каде е во тек реконструкцијата на санитарните јазли.

- Во СУГС „Цветан Димов“ се реконструираат санитарните јазли и се санираат дефекти на фекалната канализација. Комплетно ќе се реновираат фекалната канализација и санатарните јазли на приземјето и на првиот кат на училиштето. За овој зафат Град Скопје од буџетот издвои околу милион денари. Паралелно со санитарните јазли во училиштето се врши и доопремување на кабинетите кои ќе ги користат учениците од медицинската струка. Во изминатите години во ова средно училиште беше заменета столаријата и покривот на објектот, рече Трајановски. 

Град Скопје, како што рече тој, од 2009 до 2015 година за реконструкција и санација на средните училишта од буџетот има издвоено околу 227 милиони денари и со тоа значително ги подобривме функционалноста и изгледот на училишните објекти.

Директорот на СУГС „Цветан Димов“ Бесник Ајет, се заблагодари за поддршката што ја добиваат од Град Скопје и нагласи дека со овие градежни зафати ќе се подобрат условите за работа во училиштето.

Според планот за работа, за време на летниот распуст во СУГС, Георги Димитров“ се реконструира фасада на училиштето, во СУГС „Никола Карев“ се реконструира фискултурната сала, а во СУГС „Раде Јовчевски-Корчагин“ се реконструира подот во фискултурната сала. Во СУГС „Јосип Броз-Тито“ се заменува внатрешната столарија, во СУГС „Орце Николов“ се работи на реконструкција на санитарните јазли, а во СУГС„ Васил Антевски-Дрен“ се работи на реконструкција на прозорците.

Во СУГС „Марија Склодовска-Кири“ се врши реконструкција на подот во училниците, во СУГС „Димитар Влахов“ се врши реконструкција на спортски терен, а во СУГС „Браќа Миладиновци“ се работи на реконструкција на дворната површина во училиштето. Во СУГС „Боро Петрушевски“ се заменува стариот покрив со ребраст лим на помошен објект-работилница, а во СУГС „Зеф Љуш Марку“ се врши санација на покривот. Во средните училишта „Арсени Јовков“, „8 Септември“, „Здравко Цветковски“ и „Лазар Танев“ се реконструираат подовите во училиштата.