Санација на покривот на ОУ „Гоце Делчев" во Гостивар, решението привремено

На иницијатива на локалната самоуправа и училишниот одбор, денеска почна санација на покривот на Основното училиште „Гоце Делчев" во Гостивар. Од Општината појаснуваат дека решението е привремено за да се спречат поголеми штети на објектот.

- Санирањето на покривот ќе го реализираат без надоместок фирмите „Професионал Бау“ и „Леарт Проект“. Јужната страна на училишната зграда ќе биде покриена со водоотпорен материјал и ќе штити од снег, дожд и ветер, наведуваат од службата за информирање на Општина Гостивар

Покрај јужната страна, со површина на над илјада квадратни метри, со санацијата ќе бидат опфатени и оштетени делови на покривот на други делови на објектот.

Од локалната самоуправа очекуваат покривањето да заврши до крајот на неделата, а наставата да се одвива без проблеми. За трајно решавање на проблемот со покривот во ова училиште од пролет ќе се распише тендер и за време на летниот одмор ќе се изведат работите за изградба на нов покрив.