Само победа во мислите на ракометарите на Македонија

Ракометната репрезентација на Македонија вечерва го одработе последниот тренинг пред утрешниот старт од квалификациите за Европското првенство 2018 година што ќе се одржи во Хрватска. Во Скопје ќе гостува Украина, а од нашиот табор посакуваат победа за старт на новиот квалификациски циклус.

Капитенот Кирил Лазаров во пресрет на утрешниот натпревар изјави:

- Ова е нов квалификациски циклус. Примарна цел е да се пласираме на Европското во Хрватска, но ова е нешто сосема поинаку од она што не очекува за два месеци на Светското првенство во Франција. Пласманот на Европското е добар и од причина што е во Хрватска, каде во 2009 година на Светското постигнавме успешни резултати со помош и на нашите навивачи. Не смее да има изненадувања, Украина може да биде незгоден ривал. Тоа е млада селекција, но добро селектирана. Ние сме во изменет состав, но верувам во нас и очекувам прва победа и потоа пласман на ЕП.

Поради клупските обврски Дејан Манасков се приклучи меѓу последните:

- Ова е неатрактивна група со Украина, Чешка и Исланд. Но никого не смееме да потцениме. Ќе одиме натпревар по натпревар. Имавме два дена за подготовка за Украина и на терен треба да покажеме дека сме подобри од нив и да почнеме со два бода.

Натпреварот Македонија – Украина се игра утре во „ВИП Арена“ во СЦ „Борис Трајковски“ со почеток во 18:30 часот.