Саџид Џавид ќе го замени Мет Ханкок на чело на Министерството за здравство во Британија

Поранешниот британски министер за финансии Саџид Џавид ќе го замени Мет Ханкок на чело на Министерството за здравство, соопшти кабинетот на премиерот Борис Џонсон.

Џавид минатата година поднесе оставка од функцијата министер за финансии, откако одби да замени тим на свои политички советници на барање на Џонсон.

Лондонскиот весник „Гардијан“ во февруари минатата година објави дека премиерот, со цел да ја преземе контролата врз државната каса, побарал од неговиот тогашен министер за финансии, Саџид Џавид, да ги замени сите свои советници.

Џавид одби да го стори тоа, велејќи дека ниту еден министер не може да прифати такво барање и поднесе оставка, а на негово место беше назначен неговиот заменик Риси Сунак, лојален на премиерот Борис Џонсон.