САД загрижени поради талибанците во Авганистан

САД со голема загриженост гледаат како талибанските бунтовници ја преземаат контролата врз се поголема територија во Авганистан, додека американските сили се повлекуваат и се враќаат дома по наредбите издадени од претседателот Џозеф Бајден, изјави портпаролот на Пентагон, Џон Кирби.

– Време е авганистанските владини сили да вложат дополнителен напор и да ја одбранат својата земја. Ова е момент на одговорност, изјави Кирби за Фокс њуз Сандеј.

Скоро две децении САД го снабдуваа Авганистан со оружје и опрема во вредност од милијарди долари за самостојна одбрана на земјата, но сега е сè понеизвесно кој ќе ја преземе контролата по повлекувањето на САД.

Талибанците тврдат дека веќе контролираат 85 проценти од територијата, но владата во Кабул ги оспорува овие тврдења.

Кирби, сепак, не ја оспори проценката на Фокс њуз дека 13 милиони Авганистанци живеат под контрола на талибанците, 10 милиони под авганистанска влада и дури девет милиони во региони погодени од конфликти.