САД спроведоа прв реален тест за програмата за противракетна одбрана

САД и уште неколку сојузнички земји вчера првпат спроведоа тестирање на Програмата за противракетна одбрана (ПРО) во Европа, уништувајќи пробна балистичка ракета во северниот дел на Атлантскиот Океан, јави ТАСС.

Тестирањето е спроведе од ескадрилниот миноносец „Рос“, што учествува во военопоморските маневри заедно со бродови од неколку земји-членки на НАТО.

- Тоа беше првото истрелување од полигон надвор од САД на ракета-пресретнувач „Стандард-3 Блок ИА“ или накусо СМ-3, произведена од компанијата „Рејтан“ и прво пресретнување на балистичка ракета на европската сцена на воени дејствија, се вели во соопштението на прес-службата на военопоморските сили на САД.

Се прецизира дека малата балистичка ракета „Териер-Орион“ била истрелана од полигон на Хебридните острови крај западните делови на Шкотска.

Целта била пресретната и проследена од холандски воен брод, а информацијата била дадена на миноносачот „Рос“, што успешно ја пресретнал балистичката ракета во вселенското пространство, користејќи го системот „Иџис“, се наведува во соопштението.

Во планираниот тест учествувале бродови од САД, Австралија, Канада, Франција, Германија, Италија, Холандија, Норвешка, Шпанија и Велика Британија.