Ристовски: Реновирањето во студентскиот дом „Гоце Делчев“ со одлична динамика

Реконструкцијата на вториот блок во студентскиот дом „Гоце Делчев“ се одвива со одлична динамика, веќе се завршени 50 проценти од процесот и очекувам до крајот на септември да биде комплетно реновиран, изјави заменик министерот за образование и наука Спиро Ристовски.

Тој денеска изврши увид во реализацијата на градежните активности околу реконструкцијата и реновирањето на Блок А во студентскиот дом „Гоце Делчев“ во Скопје. 

- Целиот процес се спроведува од 14 кат движејќи се надоле. Сега сме некаде на половина од студентскиот дом со комплетно реконструирана инсталација за електрична енергија, поставување на парното и започнато е поставување на прозорци, изјави Ристовски.

Потсети дека со реконструкцијата студентите кои ќе треба да се сместуваат во текот следната година ќе имаат далеку подобри услови за престој и реализација на студиите.

- Во текот на вчерашниот ден е склучен и договорот со компанија што во летниот период траба да заврши со комплетно реновирање и промена на лифтовите во сите студентски домови, посебно во Скопје, истакна Ритовски.

На новинарско прашање во врска со најавените активности за изградба на нови студентски домови, Ристовски одговори дека се наоѓаат во фаза на евалуација на пристигнатите понуди и дека наскоро ќе биде избрана компанија што ќе започне со изградба на двата студентски дома „Невена Георгиева Дуња“ во Скопје и студентскиот дом во рамки на универзитетот во Тетово.

Директорката на студентскиот дом „Гоце Делчев“ Даниела Темелкова рече дека студентскиот дом располага со сместувачки капацитет за 1.200 студенти, а конкретнот блок А што моментално се реконстуира располага со 314 легла.