Ристо Самарџиев и Тајфата на Димо Дулот за пречекот на Нова година во Кавадарци

Ристо Самарџиев со својот бенд и Тајфата на Димо Дулот ќе ги забавуваат сите оние кои ќе се решат Новата 2017 година да ја дочекаат на градскиот плоштад во Кавадарци.

Зоран Станоев Дејзи, кој е дел од организацијата, денеска информираше дека во петок, на 30 декември во 12 часот на градскиот плоштад ќе биде отворен новогодишниот базар на домашна храна, вино и ракија. 

- Се очекува присуство на многубројни гости од земјава и странство. Сите тие ќе можат да уживаат во извонредниот вкус на традиционалните производи од тиквешкото поднебје. Станува збор за специјалитети кои долги години се консумираат на овие простори, а тајната за нивното приготвување се пренесува од генерации на генерации, рече Станоев. 

Во сабота, на 31 декември во 12 часот, на градскиот плоштад ќе се одржи традиционалната детска новогодишна бајка. Новогодишната бајка вклучува настап на учесниците на детскиот фестивал „Гроздоберче“ и балетските групи од градот, ќе донесе и настап на бројни жонглери и маскоти кои ќе го збогатат новогодишниот амбиент.