Пукање синоќа во Штип - Едно лице повредено, напаѓачот во бегство

Едно лице е повредено синоќа во пукање со пиштол што се случило на градскиот плоштад „Слобода“ во Штип. Полицијата презема мерки за пронаоѓање на лицето кое пукало.

Пукањето било во угостителски објект, апритоа е повредено едно лице кое е пренесено во штипската Клиничка болница. Напаѓачот кој околу 21 часот застрела млад човек во кафуле на плоштадот во Штип и избегал од местото на настанот и бил гонет од полицијата по автопатот кон Скопје.

Според неофицијалните информации автомобилот бил забележан пред патарината кај скопското село Миладиновци, а бегалецот не запрел на знакот на полицијата и ја пробил рампата продолжувајќи да вози со голема брзина. Полицајците реагирале и отвориле оган кон автомобилот, во обид да го запрат. „БМВ“-то, очигледно оштетено, е пронајдено неколку километри кон Скопје, пред влезот на индустриската зона. Нема информации дали напаѓачот е погоден.

Според неофицијални информации кои ги објавија штипските локални медиуми, напаѓачот, како и жртвата во пукањето, се турски државјани кои студираат во Штип. Ранетиот млад човек е пренесен во болница, а неговата здравствена состојба засега не е позната. Секако повеќе информации се очекуваат во текот на денешниот ден.