Проектот за граѓанско учество на УСАИД ќе ги објави добитниците на 26 грантови

Проектот за граѓанско учество (ПГУ) на УСАИД денеска ќе ги објави добитниците на 26 грантови чија цел е да ја зајакне поврзаноста помеѓу граѓаните и владата преку поддржување на конструктивна и позитивна вклученост на граѓанските организации и алијансите, и младите во дискусиии за јавни политики, обезбедување јавни услуги и развој на заедницата.

Вкупниот износ на 26-те грантови кои ќе бидат промовирани изнесува над милион американски долари.

На настанот ќе се обрати претставникот на УСАИД во Македонија Дејвид Атбери и ќе биде прикажано видео со краток опис на организациите, нивните цели и активности. Видеото е подготвено од самите грантисти и составено од страна на Проектот на УСАИД за граѓанско учество.

По завршување на презентацијата, присутните ќе имаат можност да дознаат повеќе за овој проект на УСАИД и неговите грантисти преку неколку тематски катчиња. Ќе биде дистрибуиран и Календар за планирани отворени повици за грантови.

Настанот е дел од Недела на граѓански организации поддржана од Проектот за граѓанско учество на УСАИД – серија од настани кои ја промовираат работата на граѓанските организации пред пошироката јавност.