Пробиштип ги одредува приоритетните проекти за наредната година

Општина Пробиштип работи на новиот буџет за 2019 година, а во него предвидени се и повеќе пари за инфраструктурни проекти. Градоначалникот на Општина Пробиштип, Драган Анастасов истакна дека како прв приоритет е целосна реконструкција на улицата „Тодор Александров“.

–Прв приоритет е улицата „Тодор Александров“ каде ќе се менува водоводна и канализациона мрежа, ќе се постават нови тротоари и улично осветлување.  Проектот е со вредност од 20 милиони денари, вели Анастасов.

Втората улица на која догодина ќе има многу работа, е улицата „Трети  Април“, каде што ќе има целосна замена на фекална и атмосферска канализација и изградба на  нови тротоари и осветлување.

Најголем проект за општината е проширувањето на Филтер станица, со што ќе се подобри квалитетот на дистрибуцијата на водата за пиење. Инвестицијата од 1.200.000 евра е донација од Словенија и од Владата на Р.Македонија.

Инаку Пробиштип е една од најзадолжените општини во источниот регион, а која до Владата има доставено долг од над 72 милиони денари.