При крај изградбата на повеќенаменско игралиште во Конопница

Изградбата на мултифункционалниот спортски терен во кривопаланечкотo село Конопница е во завршна фаза, информира општина Крива Паланка.

Градоначалникот на Крива Паланка Арсенчо Алексовски, рече дека ова е второ повеќенаменско игралиште во Крива Паланка кое се гради во рамки на проектот на Агенција за млади и спорт „Изградба на 100 повеќенаменски игралишта во Mакедонија“.

- Населбата има голем број жители, има и голем број млади луѓе, а од овде луѓето многу ретко се иселуваат. Mногу е важно да имаат објект каде ќе спортуваат и ќе се рекреираат, ќе го користат полезно слободното време и ќе се дружат, изјави Алексовски.

Посочи дека поради заштита на теренот и избегнување на какви било понатамошни оштетувања било неопходно да се изврши регулација на долот во месноста Боголожин дол, за што се иневстирани 2,5 милиони денари.

- Овој дол во должина од 350 метри е во непосредна близина на спортскиот терен, извршена е регулација на иститот  со средства издвоени од Министерството за животна средина и просторно планирање, околу 1,5 милиони денари и дополнителни  милион денари од општинскиот буџет, додаде Алексовски.

Динамиката на градба ќе се одвива согласно временските услови и се очекува наскоро изградбата да заврши.

Првото повеќенаменско игралиште во општина Крива Паланка во рамки на проектот на Агенцијата  за спорт и млади „Изградба на 100 повеќенаменски игралишта во Mакедонија“ беше изградено во 2014 година и се наоѓа во склоп на спортскиот комплекс каде АСМ вложи во изградба на нова спортска сала и тениско игралиште изградени 2013 година.