Презентација на извештајот „Омбудсманот - меѓу граѓаните и институциите“

Мониторинг извештајот „Омбудсманот меѓу граѓаните и институциите“ денеска ќе биде презентиран во Струмица во организација на НВО Инфоцентарот и Хелсиншкиот комитет за човекови права на Република Македонија.

На настанот ќе бидат презентирани наодите од мониторингот на работата на Народниот правобранител и од фокус-групите организирани со новинари и граѓански активисти од Струмица, Штип, Битола, Тетово и Скопје.

На презентацијата ќе говорат народниот правобранител Иџет Мемети, заменик-народниот правобранител во Регионалната канцеларија во Струмица Славчо Тимов, извршната директорка на Хелсиншкиот комитет за човекови права Уранија Пировска, извршната директорка на НВО Инфоцентар Билјана Бејкова и новинарката Гордана Дувњак.

Во рамки на презентацијата ќе има и дискусија: Дали и како Омбудсманот ги штити граѓаните и нивните права пред државните институции?, Дали граѓаните го препознаваат Омбудсманот како свој заштитник?, Дали државните институции постапуваат според укажувањата на Омбудсманот? и Дали Омбудсманот има репутација на силна, авторитетна и независна институција во јавноста?

Настанот се реализира во рамки на проектот „Граѓански мониторинг на народниот правобранител“, поддржан од Амбасадата на САД во Македонија.