Преку 1.000 маски на карневалот „Прочка“ во Прилеп

Над 1.000 маскирани од земјава и странство денеска дефилираа во центарот на Прилеп, на булеварот „Гоце Делчев“ и на плоштадот „Матодија Андонов Ченто“ на меѓународниот карневал „Прочка 2017“.

Дефилето на плоштадот го отвори препознатливата прилепска маска „Мечкари“.

Според градоначалникот на Прилеп, Марјан Ристески карневалот прерасна во бренд на Прилеп и Македонија.

- Денеска на карневалот „Прочка дефилираат преку 1.000 маскирани од Прилеп, земјава и гости од Италија, Бугарија, Албанија и од Србија. На карневалот има мнолгу креативни маски и ова е своевиден спектакл. „Прочка“ е туристички бренд не само на Прилеп туку и на Македонија нека е за многу години и нека ни простат сите ако сме им згрешиле, рече Ристески.

За Ванчо Ѓеоргиев, претседател на здружението „Прилепски мечкари“ е многу битно и што прв пат се одржа Меѓународна конференција на етнолозите од Србија, Бугарија и од Македонија за карневалските традиции на Балканот, а за прв пат дојдоа организирано и туристи од Бугарија.

- Прилепскиот карневал „Прочка“ прераснува од европски и во светски. Многу е важно што етнолозите од Балканот вчера дебатираа на првата научна конференција за карневалските традиции и маскирањето на Балканот со што ќе остане и пишан документ, а веќе на овој карнев ни пристигнаа организирано и туристи од Бугарија, прв пат со што ефектот се развива и карневалскиот туризам, рече Георгиев.

Низ булеварот „Гоце Делчев“ дефилираа, а на плоштадот „Методија Анднов Ченто“ се претставија маските од земјава и од странство. Здружението „Прочкари“ претстави и оригинална маска насловена „Астерикс и обелиск от Прилеп“.

Стручно жири ќе ги прогласи и најдобрите маски на годинашниов карневал, а според традициите утре во манастирот „Свети Ѓорѓија“ прилепските касапи кои се автори на препознатливата прилепска маска „мечкарите“ за гостите ќе го приредат традиционалниот посен ручек.