Преглед на вестите од светот

Војната во Украина не е регионална војна, туку глобален конфликт, изјави денеска генералниот секретар на НАТО Марк Руте во заедничка изјава со украинскиот министер за надворешни работи Андриј Сибига во седиштето на алијансата во Брисел.

Тој повика кога ќе се постигне прекин на огнот или мировен договор за Украина, тоа да биде трајно решение. Сојузниците продолжуваат да ја поддржуваат Украина, истакна генералниот секретар

Претседателот Володимир Зеленски во текот на вчерашниот ден го посети северниот украински регион Суми преку границата од рускиот регион Курск, каде што украинските трупи сè уште имаат мали делови од територијата. Зеленски изјави и дека членството во НАТО останува на преговарачка маса, но на Украина засега и се потребни безбедносни гаранции. Тој нагласи дека за време на претстојните преговори за завршување на војната, Украина нема да ги признае териториите окупирани од Русија и нема да се согласи да ја намали армијата.

Три лица се повредени во масовен напад со дронови врз југоисточниот украински град Днипро. При напад врз Харков, погодени се живеалишта, при што загинаа најмалку две лица, а беа повредени 32, соопштија локалните власти. Регионот на Харков последните денови е често изложен на напади.

Италијанската премиерка Џорџа Мелони изјави дека царините за ЕУ што ги објави американскиот претседател Доналд Трамп се грешка, но дека, како што наведе, тие не се катастрофални. Мелони за РАИ изјави дека влијанието на американските царини не треба да се прецени и дека одговорот на нив треба внимателно да се разгледа, пренесоа британските медиуми.

Американската администрација објави дека основната тарифа од 10 отсто за целиот увоз во САД ќе стапи на сила на 5 април, а од 9 април ќе стапат на сила и реципрочните царини за приближно 60 земји и територии кои Белата куќа ги нарече „најлоши престапници“.