Предупредување во Австралија: Циклонот Фина носи разорни ветрови и силни дождови

Тропски циклон се движи кон северна Австралија, при што австралиското Биро за метеорологија (BoM) предупредува дека до утре бурата би можела да зајакне до трета категорија.

Циклонот Фина во моментов е систем од прва категорија, соопшти BoM денеска, но може да донесе ветрови од 165 до 224 километри на час како што се приближува до Северната Територија на Австралија. Се очекуваат обилни дождови, силни ветрови и потенцијални поплави во и околу Дарвин.

Некои училишта во оддалечените заедници се затворени како мерка на претпазливост, соопштија локалните власти. Универзитетот Чарлс Дарвин ги прекина активностите, додека голем број спортски настани беа откажани и неколку траектни линии беа прекинати. Училиштата во Дарвин засега остануваат отворени.

Службите за итни случаи ги повикаа жителите сериозно да ја сфатат заканата и да ги подготват своите домови. „Не паничете“, изјави контролорот на инциденти Кирстен Енгелс за „Еј-Би-Си Радио Дарвин“. „Сакаме луѓето да бидат подготвени, навистина да го сфатат ова сериозно сега, овој систем може да донесе ветрови со бура и разорни ветрови и интензивни врнежи“, додаде таа.

Се предвидува Фина да се премести од регионот во недела навечер.

МИА