Предложено продолжувaње на „Илинденска“ до Ѓорче Петров

Булеварот „Илинден“ да се продолжи право, со мост преку реката Вардар во општина Ѓорче Петров. Се работи за капитален проект, чија минимална вредност ќе биде 10 милиони евра, а реализацијата ќе биде во 2018/2019 година.

Ова денеска беше презентирано на состанокот на претседателот на ВМРО-ДПМНЕ Никола Груевски, на кој се разгледуваше прогресот на решавање на барањата на граѓаните, кои произлегоа од теренските посети на општините низ Македонија. 

- Ова е доста комплициран проект кој не е ветен. Имаме сообраќајна студија. Се работи за  булеварот „Илинден“ да се продолжи право со мост преку Вардар, па потоа во општина Ѓорче Петров. Тоа е капитален проект. Минималната вредност ќе биде 10 милиони евра и се очекува рализација по 2018/2019. Градбата би почнала најверојатно во 2019, рече претставникот од Град Скопје, Марјан Тодоровски.

Градоначалникот на Ѓорче Петров, Сокол Митровски истакна дека овој проект е многу клучен и за нивната општина и Град Скопје. Тој дополни дека се работи за проширување на „Илинденска“ преку артерските бунари, покрај сервисите и избива на обиколницата кај селото Орман.

Груевски укажа дека доколку е возможно да се забрза реализацијата на проектот. 

- Важно е да не застане проектот, да не застанат подготовките, да се истера целата документација, сите процедури, за 2019 да е сигурно и ако може во 2018 година да се почне, рече Груевски.

Лидерот на ВМРО-ДПМНЕ истакна дека се врши политичка координација за проектите кои заеднички ги ветиле пред граѓаните и кои граѓаните ги барале при посетата на терен.

- Од тој аспект добро е да видиме до каде сме со она што го имаме ветено. Некаде работите ги извршуваат самите општини, а некаде претставници на централната власт, додаде Груевски.

На состанокот присуствуваа министерот за транспорт и врски Владо Мисајловски, заменик-министерот за образование и наука Спиро Ристовски, директорот на Агенцијата за млади и спорт, Марјан Спасески, претставник од Град Скопје и градоначалниците на општините Карпош, Ѓорче Петров, Гази Баба, Чучер Сандево, Радовиш, Кичево, Вранешница, Другово, Делчево и Неготино.