Предлог за намалување на цената на паркингот во Штип

Општина Штип и ЈП „Стипион“ кое стопанисува со паркинг местата во централното подрачје денеска информираа дека е донесена предлог-одлука за намалување на цената на дневниот и месечниот билет за паркинг.

Портпаролот на општина Штип, Драган Ристов денеска информираше дека дневниот билет ќе се намали за 20 денари.

- Тоа значи дека дневниот билет кој чинеше 80 со намалувањето ќе чини 60 денари, а месечната карта за паркинг местата од 600 ќе чини околу 400 денари. Има и други намалувања во зависност на категоријата, рече Ристов.

Општина Штип располага со 520 места за платен паркинг низ централното градско подрачје. Засега не е планирано нивно проширување.

- Во просек ЈП „Стипион“ има приход од 250.000 до 300.000 денари или од 4.000 до 5.000 евра месечно со платениот паркинг. Секако тоа зависи и од бројот на возилата. Кога имаме манифестации имаме и повеќе посетители, а со тоа и возила кои бараат паркинг, вели Ристов.

Средствата кои се собираат од платениот паркинг се доволни за да ги покријат платите и придонесите за деветмината вработени. Предлог одлуката за намалување на цената на паркинг местата во Штип е ставена на дневен ред на седница на Советот на општина Штип во петок, а на која се очекува советниците да ја прифатат.