ОН: Постои голем ризик од ескалација на конфликтот во источна Украина

Постои голема опасност од ескалација на конфликтот во источна Украина, изјави денеска помошникот генерален секретар на Обединетите нации за човекови права, Иван Шимонович. 

Тој го претстави последниот извештај за човековите права и слободи во Украина пред Советот за ОН за човекови права. 

- Конфликтот повторно преминува во фазата на ескалација, нагласува Шимонович, кој ја посети Украина на крајот на мај и почетокот на јуни. 

- Од 15 мај половина од жртвите меѓу цивилното население загинале во напади со минофрлачи и топови. Тоа се видови оружје, чие користење во зоната на конфликтот е забрането со Минската спогодба, додаде тој.

Шимонович нагласи дека од почетокот на конфликтот во источна Украина се убиени 9.449 луѓе, а 21.843 се ранети. Тој додаде дека околу две илјади од убиените се цивили.

Шимонович нагласи дека од 1 септември минатата година, кога беше објавен прекин на огнот, бројот на жртвите меѓу цивилното население значително е намален.