Почна изградбата на социјалните згради во Пробиштип

Почна изградбата на две станбени згради за лица со социјален ризик во Општина Пробиштип. Градежната механизација е веќе на терен и го расчистува просторот.  

Градоначалникот на Општина Пробиштип, Драган Анастасов за МИА информира дека проект што бил едно од клучните ветувања во неговата предизборна кампања, а со поддршка од Владата го изведува Акционерското друштво за изградба и стопанисување со станбен и деловен простор.

Тој истакна дека во Пробиштип првпат се градат станбени згради за семејства и лица со социјален ризик. 

–Со овој проект е предвидена изградба на две згради со вкупно 48 стана со квадрадура од 38 до 48 метри квадратни. Изградбата е предвидено да биде завршена во јули 2020 година, вели Анастасов.

Тој додава дека право на аплицирање за овие станови ќе имаат лица со социјален ризик, со што како што вели, општина Пробиштип ќе може да затвори еден горлив проблем со решавање на станбеното прашање на оваа група на граѓани.