Почина од леукемија момчето на кое Путин му ја исполни животната желба

Десетгодишниот Коља Кузнецов, чија животна желба да се ракува со претседателот Владимир Путин му се исполни во пресрет на Нова година, почина на интензивна нега на една московска клиника, изјави за РИА „Новости“ неговата мајка Елена Кузнецова.

Коља се бореше против акутна леукемија.

Желбата да се ракува со претседателот му се појавила на сон и не можеше ни да претпостави дека еден ден таа желба ќ ему биде исполнета. Ова Коља им го раскажа на новинарите во Кремљ на 27 декември, кога се сретна со претседателот. Штом слушна за желбата на момчето, Путин рече: „Тоа е многу трогателно и за мене неочекувано“. Коља потоа раскажа дека претседателот цврсто му ја стегнал раката.

„Коља почина на интензивна нега на клиниката „Дмитриј Рогачов“ на 19 февруари. Срцето не издржа. Секоја чест за лекарите, презедоа сѐ што беше во нивна моќ, па и повеќе од нивната моќ. Погребот беше на 23 февруари на Денот на заштитникот на татковината. Претседателот ми телефонираше и се обиде да ме утеши“, раскажа мајката на Коља.