По предупредувачки повик пронајден експлозивен механизам во близина на судот во Атина

По анонимен предупредувачки телефонски повик за поставена бомба во атинскиот суд, грчката полиција, според АНА-МПА, ноќеска пронашла ранец со експлозивен механизам во делот пред судот, јави дописничката на МИА од Атина.

Непознато лице, кусо пред полноќ се јавило во информативниот портал „Зугла” и предупредило дека во судот е поставена бомба, која ќе експлодира за 25 минути.

Полицијата веднаш пристигнала во судот, тим од Одделот за деактивирање на експлозивни направи извршил проверка, а како што објави грчката новинска агенција АНА-МПА, надвор од судот бил пронајден ранец во кој имало експлозивен механизам.