По неколку години, Полска повторно отвори два гранични премини со Белорусија

Полска повторно отвори два главни патни премини на границата со Белорусија, неколку години откако беа затворени поради влошување на односите меѓу двете земји.

Полските власти, на полноќ ги отворија контролните пунктови Кужњица и Бобровники.

Според новата одлука, преминот Кужњица – Брузги ќе пропушта само патнички возила, исклучувајќи ги автобусите, додека преминот Бобровники – Бјерестовица ќе пропушта автомобили, автобуси и товарни возила, пренесе ТВП Ворлд (TVP World).

Пред повторното отворање, возилата кои чекаа на преминот Бобровники формираа колона долга четири до пет километри. Еден од првите кој помина беше автобус кој сообраќаше од Варшава, преку Бјалисток, до белорускиот град Гродно. Неговиот возач изјави пред новинарите дека за време на затворањето бил принуден да го заобиколува Тереспол, со што рутата била двојно подолга.

Полското Министерство за внатрешни работи соопшти дека повторното отворање на двата гранични премина со Белорусија било можно дури по обезбедувањето на границата, каде голем број мигранти се обидуваат илегално да влезат во Полска.

Премините, Кужњица и Бобровники, се наоѓаат во североисточниот дел на земјата, а се очекува одлуката за нивно повторно отворање да ѝ даде поттик на регионалната економија.

Официјалните лица, исто така, соопштија дека се консултирале со локалните власти и сопствениците на бизниси, кои долго време ја повикувале владата да обнови барем една патна врска со Белорусија.

Гувернерот на Подласкиот регион, Јацек Бжозовски, рече дека бизнисите низ регионот претрпеле големи загуби за време на затворањето. Тој рече дека прекуграничната трговија долго време била клучна за економијата на тоа подрачје, кое исто така во голема мера се потпира на земјоделството.

Бжозовски додаде дека со затворањето на границата биле загрозени многу локални бизниси, вклучувајќи хотели, ресторани и транспортни компании. Тој го нарече повторното отворање „историски момент“ и ги повика претприемачите да го обноват својот бизнис.

Полска ја затвори Кужњица во ноември 2021 година, обвинувајќи ја Белорусија дека се обидува да протурка стотици мигранти преку границата со цел да ја дестабилизира земјата и ЕУ. Бобровники беше затворен во февруари 2023 година, набргу откако белоруски суд го осуди полско-белорускиот новинар и активист Анџеј Почобут на затворска казна, во случај кој беше широко осуден како политички мотивиран.