Пендаровски бара да се пролонгира важењето на личните карти

Претседателот Стево Пендаровски побара од владата да го продолжи важењето на личните документи до септември за да можат граѓаните достоинствено да ги заменат. Тој во интервју за Сител вчера рече дека ова што во моментов им се случува на граѓаните кои со денови чекаат за да ги извадат личните документи е срамно и понижувачко и смета дека не треба да биде проблем да се пролонгира целата процедура. Дополнително, рече Пендаровски, Грција не би можела да се противи бидејќи таа не реализирала голем дел од своите обврски. 

Согласно Договорот со кој се смени името, до средината на идниот месец во земјава треба да бидат сменети сите лични документи на кои го нема новото име на државата. Тоа создава огромни гужви на шалтерите на МВР кои немаат доволен капацитет да одговорат на потребите на граѓаните. Премиерот Ковачевски нема ништо против овој предлог но вели дека ќе мора да се провери дали е можно тоа да се спроведе.