Папата телефонски му ја честиташе победата на Бајден на изборите во САД

Папата Франциск му ја честиташе победата на изборите на новоизбраниот американски претседател Џо Бајден, кој кога на 20 јануари ќе даде заклетва ќе стане вториот католички претседател на САД, по Џон Кенеди.

„Новоизбраниот претседател Џо Бајден утринава телефонски разговараше со папата Франциск. Му се заблагодари за благословот и честитките”, соопштија од тимот на Бајден.

Бајден изјави дека сака да соработува со Папата „на темелите на заедничкото верување во достоинството и еднаквоста на човештвото, на прашањата како што се грижата за маргинализираните и сиромашните, кризата со климатските промени и приемот и интеграцијата на мигрантите и бегалците во нашите заедници“.

Бајден, кој има ирско потекло, се школувал во католичко училиште, живее отворено во својата вера и речиси селкоја недела присуствува на миса во малата црква во неговиот роден град Вилмингтон, во сојузната држава Делавер.

Неговата победа, што медиумите ја објавија во саботата, се уште не е признаена од Трамп, кој тврди дека Бајден е избран со кражба на гласачките ливчиња.

На прашањето за Трамп во 2016 година, папата рече дека „лицето кое сака да гради sидови, а не мостови, всушност не е христијанин“. Трамп оваа забелешка ја опиша како „срамота што еден религиозен лидер става сомнеж врз нечија вера“.