Откажани 60 отсто од летовите на „Алиталија“ поради штрајк на синдикатот

Италијанската национална авиокомпанија „Алиталија“ денеска мораше да откаже 60 отсто од своите летови, како внатре во земјата, така и во странство, заради штрајк на синдикатот.

Синдикатот протестира против најавената голема реконструкција на компанијата, со која се предвидува укинување на повеќе стотици работни места и намалување на платите.

Според наводите на италијанските медиуми, 3.000 вработени, од вкупно 12.000, може да бидат отпуштени од работа.

Во „Алиталија“ во 2008 година работеа 20.000 лица.

Лидерот на синдикатот Нино Корториљо за француските медиуми изјави дека фирмата се наоѓа во критична ситуација.

- Со месеци чекавме акционарите да смислат стратешки план за излегување од се полошата финансиска ситуација. Персоналот е многу загрижен. Тие веќе минаа низ две реконструкции, во 2008 и 2014 година, по кои 9.000 луѓе беа отпуштени од работа, рече Корторињо.