Општина Гази Баба додели два гранта за студенти иноватори

Општина Гази Баба почна да доделува грантови од по 100.000 денари за поттикнување и развивање на иновативноста кај студентите. Грантови добија два проекта - „Иновативен модуларен уред за контрола на наводнување“ на група студенти од Земјоделскиот факултет и „Зелена лична карта на Дендро паркот” од Шумарскиот факултет. 

Јавниот конкурс, кој беше објавен на 12 април, траеше до 4 јуни, а со проекти се пријавиле три факултети на територија на Гази Баба - Факултетот за туризам и бизнис-логистика при Универзитетот „Гоце Делчев“, Факултетот за земјоделски науки и храна и Шумарскиот факултет. 

Иноваторите ќе ги добијат средствата во два дела - половина пред имплементацијата на проектот, а вториот дел  откако ќе биде завршен. Крајниот рок за нивната реализација е 30 октомври оваа година. 

- Гази Баба и понатаму ќе продолжи со поддршка на проекти од сите области. Три стартап фирми веќе ја уживаат нашата потпора. Сакаме да ги мотивираме младите во осмислување и реализација на нивните идеи, за решавање на невработеноста и отворање сопствени компании, како и проекти коишто нудат семејно земјделско стопанство, истакна градоначалникот Борис Георгиевски на презентацијата на идеите, додавајќи дека реализацијата на вакви проекти во иднина значително ќе придонесе за развој на општината.