Општина Аеродром со поддршка за лицата со аутизам од здружението „Во мојот свет“

Градоначалникот на општина Аеродром Златко Марин одобри 300.000 денари за Здружението на граѓани за третман на лица со аутизам, АДХД и аспергеров синдром „Во мојот свет“ и најави продлабочување на соработката. 

 

Како што информира општина Аеродром, градоначалникот се сретнал со претставниците на здружението и се запознал со нивните потреби. Здружението „Во мојот свет“ има потреба од финансиска поддршка за вработување две лица во втора смена за што градоначалникот Марин одобрил 300.000 денари. Марин се заложил да помогне и за простории кои му се потребни на здружението.Здружение „Во мојот свет“ за аутизам 

 

- Ветувавме целосна поддршка и инклузија на лицата со попреченост и почнавме веднаш со работа во таа насока. Очекувам уште многу заеднички корисни проекти, со цел максимална инклузија за секој граѓанин, нагласил Марин на средбата. 

 

Градоначалникот и претставниците на здружението дискутирале и за организирање меѓународна конференција за оваа проблематика. 

 

Здружението „Во мојот свет“ веќе соработува со градинките и училиштата од општина Аеродром во сферата на едукација на кадри.