Околу 300 пензионери побарале бесплатен викенд и бањско рекреирање

Како што информира раководителот на Подружницата Мирослав Стојановски, пензионерите поднеле 190 барања за користење бесплатна бањско-климатска рекреација, додека 110 поднеле барање за бесплатен викенд.

 

- Пензионерите пројавуваат голем интерес за користење бесплатна бањско-климатска рекреација и за бесплатен викенд, изјави Стојановски.

 

Лани, додаде, 446 пензионери користеле бесплатно бањско-климатска рекреација и викенд.

 

Кумановските пензионери се рекреираат во Катлановска бања, а викендите ги поминуваат во македонските туристички центри. 

 

Во рамки на овој проект, за бањско-климатска рекреација, државата на пензионерите им обезбедува шест полни пансиони (ноќевање со три оброка дневно), бањска терапија, задолжителен здравствен преглед и платени трошоци за превоз во висина на повратна автобуска карта. Со проектот за бесплатен туристички викенд на пензионерите им се обезбедени два полни пансиона (две ноќевања со три оброка дневно) или, пристигнување во петок попладне, а заминување во недела попладне и автобуски превоз до хотелските објекти.