ОЈО Битола доби нов Истражен центар за борба против најтешките и најсериозните облици на криминал

Работата на Основното јавно обвинителство Битола од денес во борбата против најтешките и најсериозните облици на криминал ќе користи нов Истражен центар.

На промотивниот настан во ОЈО Битола, државниот јавен обвинител Љупчо Коцевски истакна дека очекува и петтиот истражувачки центар, по веќе отворените во Скопје, Тетово, Куманово и ОЈО ГОКК кои работат со полн капацитет, да даде видливи и мерливи резултати.

-Во иднина, ваквите добри резултати очекувам да ги следи и овој истражен центар во Битола, во кој за почеток ќе работат двајца истражители, но не е исклучено согласно потребите нивиот број да се зголемува. Овој Истражен центар на Основното јавно обвинителство Битола е потребен затоа што во последниот период, ова Јавно обвинителство работеше на повеќе тешки и сложени предмети особено од областа на економскиот и финансискиот криминал и сомнителни јавни набавки, истакна јавниот обвинител Коцевски.

Според него, новоформираниот истражен центар треба дополнително да ги зајакне капацитетите на ОЈО Битола за истражување најмногу на овие, но и на други кривични дела.

-Очекувам истражниот центар во следниот период да воспостави поврзаност со корисни бази на податоци, по примерот на оние кои веќе функционираат во другите истражни центри, а потоа тоа да можат да го користат и другите обвинителства од битолското апелациско подрачје, рече јавниот обвинител Коцевски.

Според јавната обвинителка на ОЈО Битола, Оливера Нечаковска, конечно во функција е идејата за формирање на Истражен центар.

-Со овој начин на директна, континуирана, тимска соработка меѓу органите на прогонот и Обвинителството, можеме да бидеме ефикасни во откривањето и гонењето на сторители на сриозни кривични дела, истакна Нечаковска.

Наскоро ќе биде формиран Истражен центар и во ОЈО Штип, беше најавено на денешниот промотивен настан во Битола. 

МИА