Одлуката на Трамп да ги укине санкциите против Русија предизвика незадоволство кај членовите на Конгресот

Ненадејната одлука на американскиот претседател Доналд Трамп да ги укине санкциите врз Русија само неколку дена пред да стапат во сила предизвика силно незадоволство кај членовите на Конгресот.

Законодавното тело со големо мнозинство го усвои законот со кој се воведуваат мерките, како израз на двопартискиот консензус меѓу американските политичари за поддршка на Украина во нејзината војна со Русија.

Конгресмени од двете партии ја осудија уредбата во петокот навечер, најновиот во низата потези на републиканскиот претседател за приближување на САД кон Русија.

Трамп неодамна објави договор за дизел со Путин за увоз на руска енергија како дел од стратегијата за намалување на цените на горивата на американскиот пазар, кои предизвикуваат политички проблеми во пресрет на изборите на 3 ноември. 

„Ова е неодговорно, благо кажано“, напиша сенаторот Том Тилис, републиканец од Северна Каролина, на социјалните мрежи, неколку часа откако украинскиот претседател Володимир Зеленски изрази надеж дека санкциите што требаше да стапат на сила денес и да ја погодат руската економија ќе бидат обновени.

„Што точно не им е јасно на претседателот и неговите советници во врска со спроведувањето на законот што беше усвоен со 86-11 во Сенатот?“. Неодговорно е администрацијата да капитулира пред руски диктатор кој нелегално ја нападна Украина“, истакна сенаторот.

Тој додаде дека ако Трамп навистина сака да ги намали цените на енергијата, треба да се справи со војната во Иран, која многумина ја обвинуваат за скокот на цените, „а не да му прави услуга на Владимир Путин“. 

МИА