„Нови лист“: Просечниот хрватски министер е маж од јавниот сектор на возраст од 47 години

Иако мандатарот Тихомир Орешковиќ, како што рече, своите министри ги бирал од бизнисот, академската заедница и јавниот сектор, од 23 членови на Владата, само тројца доаѓаат од приватниот сектор, пишува „Нови лист“.

Преостанатите 20 членови на Владата своите кариери ги изградиле во она што во поширока смисла го покрива јавниот сектор, значи институциите кои се финансираат од буџет.

Меѓу членовите на Владата има три жени, односно 13 отсто, додава весникот.

Членовите на Владата се во просек стари 47 години со тоа што најстариот меѓу нив е министер за земјоделство Давор Ромиќ, кој оваа година ќе наполни 58 години, а следи Томислав Карамарко, кој е една година помлад.

Најмладиот член на Владата е идниот потпретседател Божо Петров кој во октомври ќе наполни 37 години.

Интересно е и што повеќето членови на Владата, 13 од нив, се родени во градови на море, односно доаѓаат од Истра до Дубровник, додава „Нови лист“.