Нов Зеланд од денеска ја легализира евтаназијата

Од денеска во Нов Зеланд евтаназијата е легална, една година откако 65 отсто од гласачите се изјаснија позитивно за Законот за легализирање на умирањето со туѓа помош.

Партијата ACT, која го поднесе предлог-законот до парламентот, соопшти дека законот дозволува избор, контрола и милост за оние кои страдаат.

-Од денеска имаме похумано и помилосрдно општество, рече потпретседателот на партијата Брук ван Велден.

Но, критичарите на законот стравуваат дека асистираното умирање може да се злоупотреби за да се намалат трошоците за здравствена заштита и дополнително да се влоши прашањето за дискриминација на Маорите и другите заедници на Пацификот.

Министерството за здравство проценува дека секоја година до 950 луѓе би можеле да побараат евтаназија и дека на 350 од нив би можеле да им бидат одобрени барањата.