Нов хрватски министер за одбрана е Здравко Јакоп, соопшти Пленковиќ

Хрватскиот премиер Андреј Пленковиќ соопшти дека нов хрватски министер за одбрана е Здравко Јакоп, откако претходниот Марио Баножиќ вчера беше тешко повреден во сообраќајна несреќа во која загина едно лице, јави ДПА.

Јакоп е поранешен генерал кој завршил Воената академија на НАТО во Рим.

Баножиќ вчера беше разрешен откако со неговиот автомобил директно се судрил со комбе во источна Хрватска. Тој одел на лов кога се случила несреќата, јавија хрватските медиуми. Во несреќата загинал 40-годишниот возач на комбето од Привлака, а Баножиќ е тешко повреден.

Според првичните истраги, Баножиќ ја предизвикал несреќата, велат обвинителите.

Билјана Лубуриќ, заменик – државен обвинител, рече дека до несреќата дошло затоа што Баножиќ, кој возел од правец на Винковци, почнал да претекнува камион без да провери дали може безбедно тоа да го стори и директно удрил во комбе што се движело во спротивна насока.

Баножиќ е на одделението за интензивна нега во болницата во Осиек, но неговиот живот е надвор од животна опасност, изјавија за медиумите лекарите од болницата.