Нов ДУП за „Пролет“

Градоначалникот на општина Центар, Андреј Жерновски, заедно со советниците и со раководителите на секторите, синоќа оствари средба со жители на населбата „Пролет“.

Како што соопшти денеска општина Центар, граѓаните биле заинтересирани за можностите и новините од ДУП „Пролет“, кој е во фаза на изработка.

- За да се реши проблемот на сите згради, од кои најголемиот број се во лоша состојба, се предвидува зголемување на катноста за уште два спрата и поткровје. Со ова, зградите во најстарата населба во Скопје ќе станат атрактивни за инвеститорите. Тие, пак, ќе бидат должни да ја санираат зградата, да постават енергетско-ефикасна фасада, нови инсталации, но и за првпат да инсталираат лифт. Општината нарача елаборат во Институтот за земјотресно инженерство, и на средбата наредната недела ќе ги презентираме наодите за стабилноста, доколку се зголеми катноста, истакнал Жерновски на средбата со граѓаните на „Пролет“.

Граѓаните своите размислувања ќе ги искажат на наредната средба, но и на јавната анкета за ДУП „Пролет“, која, како што ветил градоначалникот, ќе трае колку што е потребно и колку што ќе побараат жителите.

Се очекува новиот ДУП да се најде на Дневен ред на една од наредните седниците на општинскиот совет.