Николоски: Партнерството со Обединетото Кралство е уникатно, договорите носат голема додадена вредност за Македонија

Додадената вредност на двата договори со Обединетото Кралство е политичка. Тоа е силен политички сигнал, затоа што финансирање проекти може да се најде и од други извори, но, вакво ниво на политички односи тешко се стекнува на друго место, вели вицепремиерот Александар Николоски. 

Според него, Договорот со Обединетото Кралство има структурна компонента, има и подршка во реформи, подршка на здравството, образованието, финансиска компонента, но на прво место е политичката компонента.

-Имаме држава за партнер од која Македoнија може да добие само многу. Ние со децении зборуваме дека на Македонија и е потребна голема држава како покровител. За жал претходните влади не направија ништо таква држава да застане позади нас, а еве ние успеавме втората најмоќна сила да застане позади нас и затоа велам дека Договорот е историски и 22 мај ќе остане запаметен во македонската историја и долго ќе се зборува за тој датум како датум за кој што Македонија со Велика Британија оствари партнерство и тоа партнерско е уникатно имајќи предвид дека никој друг во регионот  нема потпишано таков Договор и тој носи голема, голема додадена вредност во себе, потенцира вицепремиерот Николоски во емисијата „Вечерно Шоу со Богдан Илиевски”. 

Целиот процес нагласува министерот Николовски, е транспаретен.

-Критиката од опозицијата е добра, бидејќи ние решивме целиот процес да го водиме транспарентно за разлика од претходните времиња и претходни влади. Видовте дека ние Договорот го доставивме во Собрание целиот, не рековме дека е таен или е државна тајна. Гледате дека за секој чекор ја информираме јавноста и мислам дека тоа што опозицијата критикува им се враќа како бумеранг затоа што имаме целосни информации за јавноста за тоа што се случува, вели Николовски.