Нигерија ќе вложи милијарда долари во борба против бунтовниците

Државните гувернери на Нигерија одобрија милијарда долари од вишокот нафта на сметка на Владата, со цел средствата да бидат искористени за борба против терористичката група Боко Харам.

- Задоволни сме од акциите на Владата во борбата против бунтовниците и во согласност со тоа државните гувернери одобрија уплата од милијарда долари на сметка на Владата, со цел да заврши таа војна, соопштија гувернерите.

Парите се дел од сметката на која се собира вишокот од продажбата на нафта, на која има износ од 2,3 милијарди долари, според изјава на министерот за финансии на Нигерија.

Според гувернерот на сојузната држава Едо, Годвин Обасеки, парите ќе бидат искористени за купување нова опрема, обука за војската и за логистика.