Нетанјаху вети дека ќе ги врати сите заложници од Појасот Газа

Израелскиот премиер Бенјамин Нетанјаху синоќа вети дека ќе ги врати сите заложници – „и живи и мртви“ – од Појасот Газа, но не се осврна на американскиот предлог за прекин на огнот што претходно го спомена Хамас.

- Ако не можеме денеска, ќе го направиме утре, а ако не утре – задутре. Нема да се откажеме. Решени сме да ги вратиме сите – живите и мртвите, изјави Нетанјаху на говор по повод одбележувањето на „Денот на Ерусалим“.

- Нашата мисија – победа во војната, вклучувајќи ја и задачата да ги вратиме заложниците – е со нас секој ден и секоја ноќ. И вечерва, и нема да се откажеме од неа, додаде тој.

Претходно во текот на денот, во видео обраќање на неговиот канал на „Телеграм“, Нетанјаху рече дека „се надева“ оти ќе може да даде изјава поврзана со заложниците „денеска или утре“, без да открие дополнителни детали.