„Не можам да дишам“: Снимка од последните моменти на Хенри Новак предизвика гнев и протести во Британија

Велика Британија е потресена од случајот со 18-годишниот студент Хенри Новак, откако беше објавена снимка од полициски камери на која се гледа како момчето, тешко рането по напад со нож, е ставено во лисици наместо веднаш да добие медицинска помош.

Трагедијата се случила во декември 2025 година во Саутемптон. Според судските документи, 23-годишниот Викрам Дигва го избодел Новак повеќепати, а потоа на полицајците им кажал дека тој бил жртва на расистички напад и дека дејствувал во самоодбрана. Полицијата првично му поверувала на напаѓачот и го третирала Новак како осомничен.

На снимката од камерите на полицајците се слуша како Новак им кажува на полицајците дека е избоден и дека не може да дише, но еден од полицајците му одговара: „Не мислам дека си избоден, пријателе“. Момчето било ставено во лисици додека лежело на земја, а подоцна починало од здобиените повреди.

Минатата недела судот го прогласи Дигва за виновен за убиство и му изрече доживотна затворска казна со минимален рок од 21 година.

Објавувањето на снимката предизвика бран реакции и протести низ Британија. Премиерот Кир Стармер изјави дека почувствувал „мака“ додека ја гледал снимката и оцени дека постојат сериозни прашања за начинот на кој полицијата постапувала на местото на настанот. Во тек е независна истрага за однесувањето на полицајците.