НБА плеј оф: Торонто во финалето на Исток

Кошаркарите на Торонто се изборија за своето прво конференциско финале откако синоќа го победија Мајами со 116:89 и со 4-3 во победи го елиминираа ривалот.

Во мајсторката исклучително расположени беа Лаври и ДеРозан кои постигнаа по 35 односно 28 поени, а центарот Бијомбо имаше 17 поени и 16 скокови.

Во финалето на Исток Торонто ќе игра против Кливленд. Торонто до финалето на конференцијата стигна со две победи од 4-3 (Индијана и Мајами), додека Кливленд беше убедлив и двапати со 4-0 (Детроит и Атланта).

Тимот на Торонто во својата 21.сезона во НБА лигата успеа да се избори за конференциско финале, а тоа досега не го оствариле само три тима: Лос Анџелес Клиперс, Шарлот и Њу Орлеанс.

Финалето на Исток, Кливленд - Торонто почнува во вторник 17.мај, а вечерва се игра првиот дуел од финалето на Запад меѓу Голден Стејт и Оклахома Сити.