Научните докази покажуваат дека вејпингот веројатно предизвикува рак на белите дробови и усната шуплина

Истражувачи од Универзитетот на Нов Јужен Велс во Сиднеј објавија сеопфатен преглед на научни докази што укажуваат дека вејпингот веројатно е поврзан со појава на рак на белите дробови и рак на усната шуплина.

„Анализирањето опфатило широк спектар на истражувања, вклучувајќи и студии спроведени на животни, извештаи за поединечни случаи кај луѓе, како и лабораториски испитувања објавени во периодот од 2017 до 2025 година“, пишува Гардијан.

Овие податоци, според научниците овозможуваат поцврста основа за процена на потенцијалните здравствени ризици поврзани со употребата на електронски цигари. Резултатите покажуваат дека употребата на електронски цигари може да доведе до низа биолошки промени кои се поврзуваат со зголемен ризик од рак – меѓу кои се вклучени оштетување на ДНК, како и појава на хронични воспалителни процеси во ткивата. Овие механизми се сметаат за значајни фактори во развојот на малигните заболувања.

Според професорот Бернард Стјуарт и коавтор на научниот труд, врз основа на севкупните докази е заклучено дека електронските цигари веројатно предизвикуваат рак на белите дробови и рак на усната шуплина, иако во овој момент не може прецизно да се утврди колкав ќе биде вкупниот здравствен товар. Додека пак, главниот автор - вонредниот професор Фреди Ситас нагласи дека историјата покажала дека раните предупредувања за штетноста на одредени навики често биле занемарувани, предупредувајќи дека не смее да се повтори сценариото со традиционалното пушење, каде што беа потребни децении за да се потврди канцерогеност и да се преземат соодветни мерки.

По ваквите наоди, експертите предупредуваат дека вејпингот не треба да се смета за безбеден избор, особено кај младите луѓе кои претходно не користеле тутунски производи. Оттука, се упатуваат повици за воведување построги мерки, засилен надзор и ограничување на достапноста на производите за вејпинг, со цел намалување на потенцијалните здравствени ризици во иднина. 

МИА