Министерство за култура: Приоритет заштитата на црквата во Курбиново

Заштитата на црквата „Св Ѓорѓи“ во Курбиново беше и останува врвен приоритет на Министерството за култура, нагласува ресорното Министерство во реакција на денешната прес-конференција на Роберт Алаѓозовски од СДСМ кој обвини дека поради негрижа пропаѓа прочуената фреска со „Ангелот од Курбиново“, кој е симбол на банкнотата од 50 денари.

Според Министерството за култура, ако  СДСМ ги вложел макар и 50-те денари што Алаѓозовски ги покажал на прес-конференцијата  во заштитата на  црквата „Свети Ѓорѓи“ во Курбиново,  денес ќе немало потреба од, како што наведуваат, лицемерна загриженост за работи кои не ги познава и кои немаат никаква врска со она што беше изнесено пред јавноста“.

Стручни екипи на Заводот за заштита на спомениците на културата и музеј - Битола, наведува ресорното Министерство, започнувајќи од 2013 година, извршиле  конзерваторски истражувања со кои биле опсервирани состојбите на архитектурата, сликарството и покривната конструкција на црквата.

- Беше изработена анализа на актуелните аномалии и на статичката стабилност на градбата и почвата под неа, што беше остварено во соработка со Институтот за земјотресно инженерство и инженерска сеизмологија. Исто така, поставен е и привремен покрив над објектот за да може непречено да се одвива конзервацијата на архитектурата и на живописот во црквата, кој, според своите стилско-ликовни карактеристики, е пример за највисоките дострели во доменот на монументалното сликарство во источнохристијанската уметност. Согласно предвидениот план и  динамиката за заштита и конзервација се очекува  активностите  на црквата „Св. Ѓорѓи“ во Курбиново да завршат наредната година, соопштува Министерството за култура.