„Матица македонска“ ќе го одбележи 25-тиот роденден

Книгоиздавателството „Матица македонска“ вечер од 19 часот во мултимедијалниот културен центар „Матица ексклузив“ свечено ќе одбележи 25 години од своето постоење. 

Тоа е централното чествување, иако издавачката куќа четврт векот од основањето пригодно го одбележува од почетокот на годинава, со организирање промоции, средби со писатели и со изложби на познати уметници во центарот „Матица ексклузив“.  

„Матица македонска“ е основана на 24 август 1991 година и досега има објавено илјадници наслови од најзначајните македонски писатели, научници и публицисти, во тираж од над пет милиони примероци, пласирани во Македонија и во многу национални библиотеки, славистички центри и специјализирани книжарници во европските и во прекуокеанските земји.

За својата богата дејност „Матица“ е добитник на национални и меѓународни признанија, а во рамките на Клубот Матица денес членуваат повеќе од четириесет илјади читатели.