Маск соочен со официјално предупредување од американскиот антимонополски регулатор

Бурното преземање на Твитер од страна на Илон Маск и вчера продолжи да предизвикува конфузија во јавноста и посебно во неговата нова фирма, по оставките на првите луѓе на оваа социјална мрежа и реткото предупредување од американската антимонополска агенција (FTC).

-Со голема загриженост ги следиме најновите случувања на Твитер. Ниту еден извршен директор или компанија не е над законот, изјави портпаролот на регулаторот ФТЦ.

Портпаролот потсети дека платформата мора да биде во согласност со одредени правила, согласно условите од договорот потпишан со Агенцијата за безбедност и доверливост на податоците.

Договорот, што беше изменет годинава, „ни дава нови алатки за да се увериме дека тој ќе се почитува и ние сме подготвени да ги искористиме“, додаде портпаролот, мислејќи на казната што може да ја наложи ФТЦ.

Сопственикот на „Тесла“ и на „СпејсИкс“ пред една недела отпушти половина од вкупно 7.500 работници на калифорниската компанија, десет дена откако го презеде и стана нејзин единствен извршен директор.

Стотици други вработени си заминаа уште летово, а оставките на раководството на компанијата продолжија и минатата недела. „Вашингтон пост“ пишува дека неколку директори си заминале, вклучувајќи ги и раководителите за доверливост на податоците и деловно усогласување.

Маск загрижува многу власти, огласувачи, организации за заштита на малцинствата и корисници.

Тој постојано се обидуваше да ги смири сите со напомена дека не е променето модерирањето на содржините и заштитата од злоупотреба на платформата.

Но, одлуките што ги носи на брзина и неговите провокации на Твитер веќе две недели поттикнуваат различни контроверзи.