Македонија и Бугарија нема заеднички да ја чествуваат 120 годишнината од смртта на Гоце Делчев

Софија и Скопје нема заедно да ја чествуваат 120 годишнината од смртта на Гоце Делчев на 4 мај, изјави денеска в.д. министерот за надворешни работи на Бугарија Николај Милков.

На прес-конференција во Софија, Милков рекол дека не е постигнат договор со Македонија за заедничко одбележување, иако имало такви договори и практики во претходните години.

Ќе организираме прослави во Бугарија во градот Гоце Делчев со учество на највисоко ниво. На овие прослави добредојдени се и претставници на Северна Македонија, истакнал Милков.

Тој предупредил дека оние бугарски граѓани кои ќе сакаат да го посетат гробот на Гоце Делчев во Скопје би можеле да се соочат со истите проблеми како во февруари, кога се одбележуваше 151 година од неговото раѓање.

Шефот на бугарската дипломатија вели и дека засега не гледа чекори од СКопје во насока на спроведување на францускиот предлог. Смета дека е многу важно како ќе бидат направени измените на Уставот.