Ливерпул и ПСЖ обезбедија четвртфинале во ЛШ

Ливерпул со две победи од по 2:0 го елиминираше вечерва Лајпциг во осминафиналната пресметка во Лигата на шампиони (ЛШ), а пласман меѓу осумте најдобри екипи во елитното клупско натпреварување обезбеди и Пари Сен-Жермен (ПСЖ), одигрувајќи 1:1 на домашен терен против Барселона.

Предноста од 4:1 од првиот натпревар, францускиот првак ја зголеми во 31 минута преку Килијан Мбапе од пенал, а Барселона израмни шест минути подоцна со фантастичен гол на Лионел Меси од преку 30 метри.

Капитенот на каталонскиот тим во последната минута од првото полувреме можеше да донесе целосен пресврт, но Кејлор Навас го одбрани неговиот удар од белата точка. Претходно, на средина од полувремето Барселона, која целосно доминираше на теренот, пропушти уште една голема шанса, кога Сержињо Дест ја погоди само гредата од голот на ПСЖ.

Барселона продолжи да доминира на теренот и во второто полувреме, но Навас беше несовладлив на голот на ПСЖ.

Ливерпул на неутрален терен во Будимпешта со головите на Мохамед Салах во 70 минута и на Садио Мане четири минути подоцна по втор пат триумфираше над Лајпциг и со вкупен резултат од 4:0 обезбеди четвртфинале во Лигата на шампиони.

Пласман во четвртфиналето први во вторникот обезбедија Борусија Дортмунд и Порто.