Курц: Пандемијата ги покажа слабостите на ЕУ

Австрискиот канцелар Себастијан Курц изјави денеска, по повод Денот на Европа, дека пандемиската криза ги покажа слабостите на ЕУ во споредба со другите актери, а министерот за надворешни работи на Австрија, Александар Шаленберг, подвлече дека минатата година е изгубена година во однос на проширувањето на ЕУ, и тоа не смее да биде сега бидејќи ЕУ е нецелосна без Западен Балкан.

– Изминатите месеци од пандемијата не само што беа предизвикувачки за сите граѓани во Европа, туку кризата јасно ги покажа сите слабости на ЕУ во споредба со другите актери. Затоа е сега важно да се надомести недостигот со брзо и ефикасни мерки. Ние го охрабруваме заедничкиот пазар преку модернизација и дигитализација, нагласи Курц.

Тој додаде дека претстојната Конференција за иднината на Европа е шанса да се одржи отворена дебата за тоа што ЕУ мора да стори во иднина, а Австрија ќе придонесе за позитивниот развој на Унијата и зачувувањето на заедничките вредности.

Министерот за надворешни работи Александар Шаленберг истакна дека Европа мора да биде поставена така што ќе биде подготвена за во иднина.

– Клучот е проширувањето на ЕУ кон земјите од Западен Балкан. Минатата година беше изгубена година за целиот регион и сега е важно да се надомести застојот, бидејќи штетата ќе се зголеми. Без нашите партнери во Западен Балкан, ЕУ не е целосна, изјави Шаленберг.