Кумановските пожарникари гасеа пет пожари на различни локации

Кумановската противпожарна единица по синоќешните силни електрични празнења имаше неколку интервенции на пожари на различни локации од градот, соопштија денеска од територијалната противпожарна единица Куманово.

Надлежните претпоставуваат дека гром ги предизвикал двата пожари кои се случија по 20.15 часот во кругот на „Ловечки дом“ на запалена сува трева и бор и пожарот на висока сува трева во близина на градските гробишта кај „Стојан Арсов“ кои се случија по 20 часот вчера.

На овие пожари интервенирале по петмина пожарникари, со по едно противпожарно возило.

– Се претпоставува дека двата пожара настанати од гром-празнење и дошло до запалување, наведуваат од РЦУК Куманово.

Пожарникарите гаселе пожар и во село Студена Бара и кај репетитори во населбата Средорек и „Перо Чичо“. Интервенција имале и во село Долно Којнаре на запален помошен објект и сува трева и во месноста Четирска маала каде пак учествувале со две возила и пет пожарникари.

– Сите пожари навремено се изгаснати, изјави командирот на смена, Сашо Илиевски.