Конференција за улогата на НАТО во проектирањето на стабилноста на Западен Балкан

„Улогата на НАТО во проектирањето на стабилноста на Западен Балкан“ е тема на конференцијата, што од денеска до 30 август ќе се одржува во Охрид во организација на Одделението за јавна дипломатија на НАТО, Европскиот центар за безбедносни студии Маршал Центар – Гармишпартенкирхен, НАТО Колеџот во Рим и невладината Маршал Центар од земјава.

Работилницата, како што е најавено, се очекува да ја отворат претставници од НАТО,  амбасадорките на САД и Германија во земјава, Кејт Мери Брнс и Анке Холштајн, како и директорот на Агенцијата за заштита и спасување, Беким Маскути.

Меѓу предавачите, според најавата, се професори, експерти и дипломати од областа безбедноста од балканските држави, Европската унија и САД.

– Ќе се дебатира за стабилноста на Балканот и улогата на земјите од регионот, а ќе стане збор за украинското прашање и улогата на НАТО. Еден дел ќе биде посветен и превенцијата од глобалната закана за тероризам, радикализацијата и мигрантското прашање, стои во информацијата.